مَلِكْنَا سَايَرْ بِنَا مَنْ مَسِيرة لمَسِيرة

مَلِكْنَا سَايَرْ بِنَا مَنْ مَسِيرة لمَسِيرة

عيد المسيرة الخضرا

 ربعين سنة من الكفاح

نتفكروها ﯖلوبنا تبرا

 ويعود بالنا مرتاح

ارضنا بها ولات حرة

الصحرا رجعناها بلا سلاح

يا الغافل لتاريخنا عاود قرا

بلادنا أرض السلام والسماح

مسيرة سلام ما فيها مضرة

بلادنا جنة معروفة رمان وتفاح

350 الف متطوع شارك فيها راجل ومرة

 ربعين سنة تطوات فيها لجراح

وحالفين ما نسامحو فترابنا ولو فذرة

 خمم وعاود لحساب يا لخاوا وقارن يا صاح

رايتنا عالية حمرة وسطها نجمة خضرة

بلادنا يحبها كل من زارها من السواح

المسيرة بها فرحات النخلة والتمرة    

عديانا تلات بهم ليام رجعوا فمعرة

شوف حالة لعدو بالحقد راه جاح

وشعلات النيران فقلوبهم جمرة

هذا حال من خان بلادو وعنها راح      

رضاو بخيام العار وعيشة القهرة

والذل والسعاية ما تسمع غير لنواح

وخلي لعديان فهبالهم عايشين فحيرة

وذليلهم من الخيانة ساير يشرب فلقداح

فهموم التيه شلى منهم فحكرة

هما الظلام وحنا نور الصباح 

المسيرة الخضرا خلاها ملكنا المرحوم ذكرى

والصحرا بلادنا عليها الدم ساح

ومقترح الحكم الذاتي اليوم مبهاها فكرة

وربنا يرحم شهدائنا ويطهر لرواح

وملكنا ساير بنا من مسيرة لمسيرة

عارفين حنا اهل الحق ومتوكلين على الله الفتاح    

لقلوب فرحانة بالتنمية من طنجة لكويرة

 بلادنا تغيرات ولات أيامها أفراح 

اليوم هو عيدنا عيد لمسيرة لخضرا

العمراني